Feeds:
Posts
Comments

Posts Tagged ‘粵拼’

大家識晒所有 母音 (vowels) 之後,今次我會講吓 子音 (consonants) 嘅部份。

喺lshk入面,子音有19個,下面用發音方法分類﹕
(1) 塞音 stops
p, b, t, d, k, g, kw, gw
(趴巴他打卡加瓜跨)

(2) 摩擦音 fricatives /  塞擦音 affricates
f, s, h, c, z
(花沙蝦差渣)

(3) 鼻音 nasals
m, n, ng
(媽拿鴉)

(4) 近音 approximants
w, j, l
(娃廿啦)

基本上同英文好接近,不過要留意以下幾點:
(i) p, b; t, d; k, g; kw, gw; c, z 呢五啤,並唔係清濁音嘅分別,而係前者送氣,後者不送氣。
(ii)  j  代表嘅係 「一二廿人有要飲」呢啲字嘅子音,同國際音標一致,但係同英文唔同。
(iii)  c 可以表示 「前、清、痴」呢個音,亦都可以係「唱、蠢」嘅音。喺香港粵語唔區分,所以兩個發音都係用 c 呢個字母代表。z 嘅情況亦都一樣。
(iv) 上面有底線嗰六個音 (p, t, k, m, n, ng)  可以用喺音節尾。
例子:執 (zap1) 質 (zat1) 側 (zak1) 針 (zam1) 真 (zan1) 憎 (zang1)

Read Full Post »

上次講咗廣東話嘅開母音。今次會講埋淨返嗰啲母音。

<短母音>
廣東話嘅開母音有個共通點,就係全部都可以拉長嘅。因為廣東話嘅短母音唔可以單獨出現。今次我會講吓唔可以拉長嘅母音--短母音。記住呢啲母音唔可以單獨出現嘅。基本上每一個短嘅母音 都係 另一個母音嘅 短版。喺呢度我會將長短做個比較俾大家睇。

a
記得 aa 係 代表 「丫」呢個聲嘅 母音啦。我哋睇吓「啱」( aam1) 呢個字。如果將個字縮短噉讀,母音部份就會變咗短母音嘅 「庵」(am1)。
aa 同 a 個分別喺廣東話好緊要。 好似 「街(gaai)、雞(gai)」,「衫(saam)、心(sam)」等等。

eo
呢個串法可能有啲奇怪。喺粵拼度佢係代表短版嘅 oe (靴、想、削)。 基本上只係得 eoi,eon 同 eot 呢三個變化。記住下面嘅例子就okay。
eoi: 水、居、墟、累、追
eon: 蠢、鈍、論 、盡
eot: 出、捽、律、術

(more…)

Read Full Post »

相信大家都知道,全世界所有語言都係有咗聲,先至會有字嘅。如果淨係針對口語嘅話,大部份語言 (手語除外),只要將啲聲音適當噉放埋一齊,就會成為一句可以傳達意思嘅句子。要用拼音記低一隻語言,就係要將呢個過程倒轉做一次--將啲聲音由有意思嘅句子拆返開做唔同零件,再用符號記低。

今日我哋一齊睇吓LSHK呢套粵語拼音方案點樣將廣東話嘅音聲有系統噉拆做唔同嘅零件啦。廣東話通常都係一個字,一個音節嘅。粵拼用「音節」做單位,所以亦即係用「字」嚟做單位;每一個音節都係由母音 (vowels, 簡稱 V), 子音(consonants,簡稱 C),聲調(tones) 三樣嘢組成。好似「學」字,佢嘅粵拼係 hok6。h 同 k 係子音,夾住 o 呢個 母音。而數字6 代表佢係第六聲。

今日我會集中講吓「母音」呢部份。

喺呢度我會用例子話你聽廣東話有邊啲母音。首先我姑且將母音分做開母音 同 閉母音兩類。開母音總共有下面七個,出現得好頻密。閉母音嘅分佈有好大限制,我會留返下次再講。
(more…)

Read Full Post »

首先喺我介紹LSHK拼音之前,我想講吓點解我哋要一套標準、統一嘅粵語拼音。我認為主要有兩個理由。

一)有啲字寫唔到出嚟

粵語係用漢字書寫嘅語言。不過由於粵語吸納咗大量唔同民族嘅詞語,所以有好多詞語有得講,冇得寫。通常有咩嘢寫唔出嚟嗰陣,我哋會造一隻新字去表達。呢個方法固然可以保持到粵語同漢字圈語言嘅互通性,不過以下幾個範疇嘅詞,一直都冇統一嘅漢字去表達,令到書面粵語受到唔少限制。

  1. 擬聲詞
    a. 「諸如此類」kick-lick-kark-lark
    b. 「索鼻涕」 fee-lee-fat-let
    c. 「嘈」   bing-ling-bang-lang
  2. 語末助詞
    a. 「你返到_?我食咗飯_,你未食飯咩?你食個飽先_」
    (註:上面啲空格冚唪冷係「喇」,但係聲調唔同。)
    b. 「幫我睇睇_?我唔識_。你都唔識_?唔係_!」
    (註:上面啲空格係  「呀」,但係聲調唔同。)
  3. (more…)

Read Full Post »