上次講咗廣東話嘅開母音。今次會講埋淨返嗰啲母音。
＜短母音＞
廣東話嘅開母音有個共通點，就係全部都可以拉長嘅。因為廣東話嘅短母音唔可以單獨出現。今次我會講吓唔可以拉長嘅母音－－短母音。記住呢啲母音唔可以單獨出現嘅。基本上每一個短嘅母音 都係 另一個母音嘅 短版。喺呢度我會將長短做個比較俾大家睇。
a
記得 aa 係 代表 「丫」呢個聲嘅 母音啦。我哋睇吓「啱」( aam1) 呢個字。如果將個字縮短噉讀，母音部份就會變咗短母音嘅 「庵」(am1)。
aa 同 a 個分別喺廣東話好緊要。 好似 「街(gaai)、雞(gai)」，「衫(saam)、心(sam)」等等。
eo
呢個串法可能有啲奇怪。喺粵拼度佢係代表短版嘅 oe (靴、想、削)。 基本上只係得 eoi，eon 同 eot 呢三個變化。記住下面嘅例子就okay。
eoi: 水、居、墟、累、追
eon: 蠢、鈍、論 、盡
eot: 出、捽、律、術
i
i 雖然係開母音 「衣」，但係呢個字母同時代表 -k 同 -ng 前面嘅短母音。將開母音 e 縮短 就會變咗 i。好多 -ing 尾嘅字，都可以讀做 -eng 嘅。好似 「正」(zing3/zeng3)，「聲」(sing1/seng1) 噉。記住 i 除咗代表 「衣」之外，仲可以表示短嘅 e。
u
同 i 嘅情況一樣，雖然佢係開母音「烏」，但係呢個字母同時代表 -k 同 -ng 前面嘅短母音。將 o 縮短 就會變咗做 u。
＜二重母音＞
有部份嘅字，佢個讀音好似唔只得一個母音，好似係兩個母音連住讀噉嘅。好似個「街」字噉，你讀嘅時候就好似讀個「家」字，之後讀個「衣」字噉。(當然你並唔係真係讀完「家」再讀「衣」，而係個口形慢慢由「丫」變做「衣」)
不過喺廣東話呢都幾簡單，因為收尾永遠都係 -i 同 -u 呢兩個。
-i 收尾
街(gaai1)、雞(gai1)、基(gei1)、 該(goi1)、攰(gui6)、居(geoi1)
-u 收尾
膠(gaau1)、鳩(gau1)、撬 (geu6)、高(gou1)、嬌(giu1)
－－－－－－－－－－－－－－－－－－－－－－－－－－－－－
練習：
膠 g___
都 d__
廢 f__
事 si
俾 b__
出 c__t
去 h___
食 s_k
零 l_ng
食 s_k
哇塞，居然是沙发？留个名